Un collega racconta in lingua veneta
Vino Raboso, schei e….. Venere teutonica
Xero
da poco entrà in banca a lavorar. I me gaveva messo ai sportei a far
ricevute dei versamenti dei clienti e, co sta scusa, me capitava anca de far
qualche ciacoea co chi gaveva voia de ciacoear… e i xera in tanti a gaver
sta voia parchè na volta parlar co uno de banca xera come parlar col
farmacista o col prete… no par gnente na volta i ciamava e banche sacrari
finanziari…
Na matina, me ricordo come fusse desso, xe vegnua da mì na dona ben fata ma
alta che no ve digo, squasi un metro e otanta, co do tete che quando che eà
se moveva e impeniva eà camiseta bianca na volta a destra na volta a
sinistra del peto a seconda del movimento chea fasseva, proprio come fa un
liquido che ciapa forma a seconda del vaso che te eo meti, parchè ste tete e
xera grande come due meoni ancora crui, e, par dir a verità, a mi ste robe
non e me dava par gnente fastidio, ansi….ma, gavè da credarme, xera davero
dificie contar i schei parchè el straviamento el xera continuo….
Sta dona, eo go capìo dopo ciacoeando, molto siora de fameia, eà xera na
parente dea “Regina Socoera” che eà gaveva un staeo de biciclete tacà el
Munissipio de Mestre. Oltre ai schei sta dona eà gaveva na casa in pieno
centro de Mestre, in mexo ai paeassoni, tacada anca questa al Munissipio
come eà Regina Socoera, na miliardaria questa che eà pareva morta de fame….
Sta magiorata fisica eà me conta de esser na capa de l’Inam e eà me invita a
casa sua a tor altri schei che eà gaveva sconti soto el secer parchè no i
ghe robasse quando che eà xera al lavoro.
Eà sera stessa so ‘ndà a casa sua e, prima de darme i schei, eà gà vossuo
ofrirme un bicer de vin raboso, bon che mai e che mi gò bevuo tuto de na
sciada .. “Sel te piase, te ne verso naltra giossa”, eà me ga dito e mi go
risposto subito de si e, par creanza sta dona formosa eà gà vossuo anca ea
farme compagnia bevendoghene tanto come mi, squasi da finir eà botiglia,
magnando do tre fetee de formaio grana e dolsi de tuti i tipi.
A un serto momento, con un fià de confidenza fata in pressa, eà me ofre un
ciocoeatin perugina e co tanto coraio dovuo anche ai biceri de raboso bevui,
eà me mete sto ciocoeatin in boca sfregandome, coi polpastrei dei dèi, i me
eàvari tanto da farme vegnir un saco de spissa in tuto el corpo .. “Qua ghe
semo” – me so dito. Infati eà gà continuà a darme da bevar butandosene anca
ea tanto come mi e, dal dito al fato, se trovemo sentai su un sofà de veudo
coeor ciclamino parchè no xerimo più boni de star in pie par el vin, ma
forse anca parchè gavevimo voia de star butai….
Sta tetona, sicuramente de venti ani più vecia de mi, ma tanto bona, ansi
tantissimo, eà gà scominsia a perderse via co cocoe improvvisate de ogni
tipo fino a rivar al squasi proibito, toendome el fià….anca pal peso. No ve
digo de preciso come che eà xe ndada finir parchè si no me pararia de darve
dei imcompetenti in materia e gavaressi tute e raion par darme del mona anca
a mì…
Intanto, fra na roba e ealtra, eà gà vossuo prepararme anca da magnar e, man
man che eà preparava, eà veniva a butarme .. giosse suplementari de raboso….
e stavolta coe tete squasi fora parchè eà so camisa se gaveva sbotonà da
soea (?) e sta improvisata gà finio per imbriagarme ancora de più del raboso.
El resto, come gò dito anca prima, no ve eò conto parchè eò gavè xa capio
ben sensa che fassa altre zonte.
Aea fine, quando xero drìo sauedarla par ndar via, sta capa del’ Inam eà se
ga ricordà che mi xero ‘ndà eà par tor dei schei da depositar in banca “ Te
dago i schei da metar sul me conto parchè me xero squasi desmentegà parchè
te xeri vegnuo quà…, eà me ga dito, parchè con na serata cussì, se va via
coea testa…”
Eà me da sti schei che i xera tanti, me par diese carte da diese mie, e no
eà vol gnanca che ghe firma na ricevuta… ormai eà me conosseva xa bastanza
ben dentro e fora e eà se fidava….
Xero tentà de passar da novo a trovarla, ansi ghe eò gavevo adiritura
promesso de farlo, ma aea fine me gà fregà eà me ….“serietà
professionale”…(se fa par dir).
Infati no so’ più ndà casa sua pensando però de… tegnermea bona in caso de
crisi, no serto de governo come desso.
Par fortuna, de rifa o de rafa, go sempre trovà altri posti più tranquii
dove ndar a bevar el raboso…anca sensa ‘ndar a casa de na funssionaria dell’Inam.
Na roba però voio dir prima de finir : dopo queo che me xe sucesso, ogni
volta che i me ofre el vin raboso, avverto una certa defaillance: me par
infati che tutti i altri rabosi che i me ofre i gabia manco… grado…..
Nane Indrìo da Venessia-Feltre
Piazza Scala - marzo 2014