pezzo scritto nel 1989 da Arnaldo De Porti,  sotto lo pseudonimo “Nane Indrìo”, cercando di interpretare una  realtà contadina, tratto da una raccolta di pezzi in dialetto veneziano)
 

Mi, tante volte, me morsego i déi parchè, da picoeo, no gò vossùo 'ndar scuoea. Co gò capìo el sbalio, me so notà da grando ae scuòe serài, ma me gà tocà moeàr tuto parchè i tosatèi i gà tacà cojonarme e, i veci in ostarìa, a ridarme drìo dixendo "ara el pandoeo che va scuoea".

Me ricordo come fusse desso chea santa dona de me mare che me preparava el traverson nero chel xera deventà parfin lucido da quante volte che lo gaveva stirà, el xera anca pien de busi parchè ogni tanto a me mare ghe cascava qualche bronsa dal fero. Sto traverson el gaveva cusìe e strichete ceèsti suea manéga parchè, na volta, a chi che fasseva ea prima elementar i ghe meteva na stricheta, a chi che fasseva ea seconda i ghe ne meteva do e sempre vanti cussì.

E tuto xe 'ndà ben fin aea tersa che me gà tocà ripetar do volte sempre col stesso traverson che, da tanti busi chel gaveva, el xera deventà na passadora che me rivava meso metro sora i xenoci.

Quando che finalmente so passà in quarta, xe nato un casìn: me pora mare infati, invesse de metar na stricheta ceèste prima del sinque romano, la gà messa dopo e, quando che so 'ndà scuoea, i se gà messo ridar tuti come mati, anca el maestro. I me dixeva infati che xero passà in...sesta. E da chea volta no so 'ndà più scuoea, anca se me pare me petava qualche stramuson parchè 'ndasse.

Me ricordo che, povero vecio, el me gaveva comprà anca 'na sachéta nova tocando i schei che ghe serviva par comprar 'na soranèa. Na roba però no gò capìo tanto ben e gnanca desso eà capisso: se el me bastonava parchè no voevo più 'ndar scuoea o parchè el gaveva butà via par gnente i schei che ghe serviva par comprar eà vaca sorana...