POITICI, WWF, LIPU E I ….CAPONI

 

Soto e feste de Nadal, mì Nane Indrìo, so ‘ndà far un gireto in motorèa. So passà par Xero Branco, Capèa e go visto dei cartèi co su scrito : “Vendita caponi”.
Sarà sta che soto e feste de Nadal uno se sente più bon, fato sta che go pensà a ‘ste pore bestioe che i ghe cava via tuto par farle deventar più bone da brodo e da esso par eà magnada de Nadal.
Soeo a pensarghe, me xe vegnuo i sgrisoi che me partiva daea copa e i ‘ndava finir in quea parte del fondo schina che dopo eà cambia nome, tanto che par farmei passar me ga tocà ‘ndar bevar na graspeta al salto. Ma ‘ndando casa go pensà ancora a sti pori gài che, oltre al doeor fisico dovuo al fato che i vien castrai, i ga da patir anca na forte umiliassion quando che, na volta castrai, ghe passa davanti na bea gainota che mena eà coa par stussegarli e eori ghe toca far finta de gnente..
A sto punto me so domandà parchè quei dell’ente protession animai, quei del WWF e dea LIPU i fa tanto casin parchè i copa un oseeto e i se ne frega dei…caponi. E po’ che sia proprio vero che castrandoi i deventa più boni da magnar ?
Raionando cussì, se xe vero che tirandoghe via tuto i gai deventa più boni, se podaria aplicar sta regoea anca par i poitici, par quei del WWF e dea LIPU, parchè i diventasse un fià meio de queo che i xe.
Pol darse che in qualche caso anca e muger e sarià più contente…

 

Chi desidera una traduzione (e pensiamo che saremo in molti.....) contatti Nane all'indirizzo
dearstern@hotmail.com
 

 

 

 

 

 

 

 

Piazza Scala - dicembre 2010